'Magulang' sa trabaho, inutas ng kasamahan

MANILA, Philippines - Dahil umano sa madalas na manggulang sa trabaho dedo ang isang tsuper na binaril ng kanyang kasamahan kamaka­lawa ng gabi sa Navotas City.

Dead-on-arrival sa Tondo Medical Center sanhi ng tama ng bala sa dibdib ang biktimang si Genaro Tecson, 51, company driver ng FV Marine Supply, na matatagpuan sa Brgy. Bangkulasi ng nabanggit na lungsod.

Pinaghahanap naman ng pulisya ang suspek na si Ange­lito dela Cruz, kasamahang driver ng biktima.

Sa report ng pulisya, naganap ang insidente dakong alas-10:30 ng gabi makaraang komprontahin ng suspek ang biktima sa labas ng warehouse ng nasabing kompanya dahil umano sa madalas itong manggulang sa trabaho. Hindi naman pinansin ng biktima ang suspect na lalong ikinagalit ng huli kung kaya pinaputukan nito ng baril ang kasamahan saka mabilis na tumakas.Patuloy pa rin ang imbestigasyon sa insidente.