MANILA, Philippines - Isang 23-anyos na dalaga ang nasawi matapos itong makasamang malitson sa nasunog nilang bahay kahapon ng tanghali sa Caloocan City.
Sunog ang buong katawan nang matagpuan si Maria Christina Arcega, ng J. Ramos St., Sangandaan ng nabanggit na lungsod.
Sa inisyal na report ng Caloocan City Fire Department, dakong alas-11:30 ng tanghali nang masunog ang bahay ng biktima dahil sa faulty electrical wiring.
Mabilis na kumalat ang apoy at nadamay ang siyam na kapitbahay nito. Nabatid na hindi na nakalabas ang biktima, na sumiksik sa ilalim ng lababo ng kanilang kusina.
Naapula naman ang apoy dakong ala-1:45 kahapon ng hapon kung saan inaalam pa kung magkano ang napinsalang ari-arian sa naganap na sunog.