MANILA, Philippines - Isang pedicab driver ang binaril sa ulo at napatay ng isang pasahero dahil nagtalo ang mga ito matapos piliting singilin ng una ang huli ng pasahe samantalang lumipat ito ng ibang pedicab kamakalawa sa Navotas City.
Dead on the spot sanhi ng tama ng bala sa ulo at likuran si Wilfredo Babon, 42, ng Phase 6, Flovi Homes, Brgy. Tonsuya ng nabanggit na lungsod.
Ayon sa report ng pulisya, naganap ang insidente dakong alas-3:00 ng hapon sa loob ng Market 3, Navotas City Fish Port ng nabanggit na siyudad.
Nabatid na unang sakay ng biktima ang suspect na lumipat naman sa ibang pedicab, gayunman sinisingil ito ni Babon. Nagbigay naman ang suspek subalit naliitan ang biktima na naging dahilan ng pagtatalo hanggang sa bunutin ng una ang dalang baril at paputukan si Babon.
Matapos ang insidente ay tumakas ang suspek habang dinala naman ang biktima sa pagamutan.