Vendors sa City Hall winalis

Manila, Philippines - Tuluyan nang winalis ni Manila City Hall City Security Force (CSF) chief Ret. Major Nicolas Amparo ang mga vendor sa loob ng Manila City Hall matapos ang patung-patong na reklamo ng publiko.

Ayon kay Amparo, agad siyang naglabas ng ka­utusan na nagbabawal sa mga vendor­ na magtinda sa loob ng city hall dahil nakakasikip ang mga ito sa mga nagsasagawa ng transaksiyon.

Aniya, may mga canteen at lugar ng kainan sa city hall kung kaya’t walang dahilan upang magkalat ang mga vendor.

Sinabi ni Amparo na may mga vendor na silang hinuli at kinasuhan na indikasyon na hindi sila nagpapabaya sa kanilang tungkulin.

Bukod dito, sinabi pa ni Amparo na nagpamahagi na sila ng anunsiyo sa mga vendor na bawal na ang pagtitinda sa loob ng City Hall.

Dinagdag pa ni Amparo na bukod sa kanilang mahigpit na seguridad laban sa mga vendor, mahigpit din ang kanilang pagbabantay laban sa mga nagbabalak gumawa ng kaguluhan sa city hall.