MANILA, Philippines - Nasira ang pangarap ng isang 19-anyos na estudyante na makatapos ng kursong criminology matapos na pagbabarilin hanggang sa mapatay ng dalawang armadong kalalakihan sa lungsod Quezon, iniulat kahapon.
Kinilala ang biktima na si Remark Mutia, ng Grapes St., Brgy. Commonwealth sa lungsod. Si Mutia ay nagtamo ng tama ng bala ng kalibre 45 na baril sa ulo at katawan.
Sa ulat ng pulisya, nangyari ang insidente sa may Mango St. sa naturang barangay ganap na alas-2:45 ng hapon. Nakikipaglaro umano ng basketball ang biktima sa kanyang mga kaibigan nang biglang dumating ang mga suspect at saka malapitan itong binaril. Matapos masigurong patay na ang biktima ay saka mabilis na tumakas ang mga salarin.
Ayon kay Hernandez, wala pa silang nakikitang motibo sa pamamaslang sa biktima, pero maaaring may dati nang may galit sa biktima at binalikan siya bagay na sinisikap ngayong tukuyin ng pulisya.