Iniwan ng ka-live-in, caretaker nagbigti

MANILA, Philippines - Isang caretaker ang nagpakamatay sa pamamagitan nang pagbibigti matapos umanong hiwalayan ng kanyang live-in partner kamakalawa sa Ma­labon City.

Patay na nang matagpuan si Darwin Andaya, ng Paez Ville, Brgy. Dampalit ng nabanggit na lungsod.

Sa naantalang report na nakarating kahapon sa Malabon City Police, dakong alas-2:30 ng hapon nang matagpuan ang katawan ng nasawi sa loob ng banyo sa 2nd floor ng binabantayan nitong bahay sa naturang lugar.

Ayon sa salaysay ng mag-inang sina Esterlita Ganzan, 59; at Renato, 39, kasamahang caretaker ng biktima, huling narinig ng mga ito na nagtatalo si Andaya at ang live-in partner nitong si Annalyn Savellano, 34, sa loob ng kanilang tinirhan.

Matapos ang pagtatalo, umalis si Savellano at maka­lipas ang dalawang araw ay natagpuan na lamang ng mag-ina ang walang buhay na katawan ni Andaya na nakabigti sa loob ng banyo gamit ang isang nylon cord.

Sa pagsisiyasat ng mga rumespondeng SOCO, nasa tabi ng biktima ang cellphone nito at nabasa sa sent items na ipinadala sa kanyang live-in partner na “hiwalayan mo ako, magpapakamatay ako” at nakasaad naman sa inbox ang reply ni Savellano, na “Magpakamatay ka”.

Kaugnay nito, patuloy ang masusing imbestigasyon ng mga awtoridad upang matukoy kung may naganap na foul play sa pagkamatay nito.