MANILA, Philippines - Pinaniniwalaang hindi napigilan ng isang call center agent ang sarili, kaya nagawang pagnakawan ng cellphone ang kaniyang kasamahan sa trabaho kaya nadakma ng pulisya sa Mandaluyong City noong Sabado ng gabi.
Sising-alipin naman ang suspek na si Jason Tumbali, 23, kawani ng Teleperformance sa EDSA Central at naninirahan sa Dave St., Hillcrest Village, Novaliches, North Caloocan City.
Si Tumbali ay inireklamo dahil sa pagnanakaw sa LG brand model GM3601 cellphone ng kanyang kasamahan sa trabaho na si Jeremae Boboran, 22, dalaga, ng Banahaw St.sa Highway Hills, Mandaluyong City.
Hindi naman nakapalag pa at sa halip ay umamin sa kasalanan ang suspek, dahil naaktuhan sa CCTV camera ang ginawang pagnanakaw.
Sa reklamo ni Boboran kay PO3 Joemer Puzon, dakong alas-7:30 ng gabi nang madiskubre nito na nawawala sa locker ang kanyang cellphone.
Tinanong ng biktima ang mga kasamahan, kabilang ang suspek ngunit walang umamin kung sino ang kumuha ng cellphone, kaya’t nagsumbong na ito sa kanilang security, at dito natuklasan sa record ng CCTV na ang suspek ang magnanakaw.
Naniniwala naman ang mga awtoridad na posibleng may sakit na ‘kleptomaniac’ ang suspek dahil ayon na rin mismo sa kaniya, alam niyang masama ang magnakaw subalit hindi niya napigilan ang sarili na gawin ito.