Tsinoy timbog sa P10-M pekeng Lacoste

MANILA, Philippines - Inaresto ng mga ele­mento ng PNP-Criminal Investigation and Detection Group (PNP-CIDG) ang isang   Filipino-Chinese trader kasunod ng pagkakasamsam sa P10-M halaga ng mga pekeng pro­duktong Lacoste sa magkakahiwalay na raid sa lungsod ng Parañaque at Pasay , ayon sa opisyal kahapon.

Sinabi ni PNP-CIDG Director P/Chief Supt. Samuel Pagdilao, aabot sa 22,000 piraso ng mga pekeng Lacoste shirts ang nakumpiska ng mga operatiba ng NCR-CIDG.

Bandang alas-11:30 ng umaga nang salakayin ang unang palapag ng Terminal Plaza Mall sa Baclaran, Parañaque at stockroom nito sa ikatlong palapag ng Unit 304 na matatagpuan sa #215 F. Angeles St., Pasay City.

Arestado naman sa ope­rasyon si Susan Ong, may-ari ng nasabing mga esta­bli­simento at nasa likod ng pagbebenta ng mga pekeng Lacoste shirts.

Isinagawa ang raid sa bisa ng search warrant na inisyu ni Judge Ma. Theresa Dolores Gomez-Estoesta ng Regional Trial Court Branch 7 sa lungsod ng Maynila.