Ginang utas sa parak

MANILA, Philippines - Matapos masangkot ang tatlong pulis-Makati sa pama­maril sa isang 13-anyos na basurero, isa na namang pulis ang iniulat­ na nakabaril at nakapatay sa isang 27-anyos na ginang sa Tondo, Maynila kamakalawa ng gabi.

Kinilala ang nasawing biktima na si Lilibeth dela Cruz, ng   Herbosa Ext. St., Tondo.

Suspect umano ang isang Allan Tolentino na miyembro ng Northern Police District.

Ayon sa ulat, dakong alas-9:00 ng gabi ng maganap ang insidente sa bahay ng biktima.

Nabatid na nagtungo umano ang suspect sa bahay­ ng biktima upang maningil ng pautang. Habang natutulog naman umano ang live-in partner ng biktima na si Jonathan Hortaleza ay sumisigaw at pilit na pinabubuksan ng suspect ang pintuan kaya binuksan ng biktima, gayunman nagkataong nagpaputok umano ng baril ang suspect nang lumabas ang biktima na tinamaan sa tiyan.

Nabatid na ang pakay umano ng suspect ay ang babaeng pinsan ng biktima habang ang live-in partner ng nasawi ay pinsan­ naman ng nasabing pulis kaya nakuha ang pagka­kakilanlan nito.