Parak 'tinalo' ng carnappers

MANILA, Philippines - Isa sa 75 miyembro ng iti­­nalagang tourist-oriented police for community order and pro­tection (TOP-COP) ang na­biktima ng carnapping, sa loob ng Rizal Park sa Ermita, Maynila, kahapon ng hapon.

Sa reklamong inihain ni PO1 Edward Gamotea sa MPD-Anti-Carnapping and Hijacking Section, nawala ang kanyang Honda XRM (5512-TT) na kulay puti na ipinarada niya sa Rizal Park habang siya ay dumadalo sa tourism awareness se­minar ng TOP COP, sa loob ng Depart­ment of Tourism (DOT) dakong ala-1:30 ng hapon.

Matatandaang ikinagalit ni Pangulong Noynoy Aquino ang kawalan ng pulis nang mag-ikot siya sa tourist belt, partikular sa Luneta Park noong Lunes Santo kaya’t sinibak ang hepe ng PCP-Luneta na si C/Insp. Efren Pangan at pinalitan ni C/Insp. Randy Maqluyo.

Kasunod nito, nagtalaga ng kabuuang 75 tourist police sa Rizal Park na nagmula sa MPD Headquarters, MPD Station 5   at Station 9 para magbigay ng sapat na seguridad at impormasyon para sa mga local at foreign tourists.

Kahapon ang ikalawang araw ng seminar ng TOP COP, kung saan kabilang si PO1 Ga­motea sa 2nd Batch na dumalo sa seminar na dito nadale ang kanyang hinuhulugang­ motorsiklo.