8-anyos nilamon ng ilog

MANILA, Philippines - Animo’y na-engkanto ang isang 8-anyos na batang lalaki matapos na malunod habang naliligo sa ilog Pasig sa Pasig City noong Biyernes Santo.

Hindi na umabot ng buhay sa Rizal Medical Center si Elmo Villanueva ng #182 Sampaguita Street sa Purok 4, Barangay Pineda, Pasig City.

Sa imbestigasyon ni PO3 Fernan Clemente ng Station Investigation Detective Management Branch, lumilitaw na dakong alas-4:30 ng hapon nang magkayayaan maligo sa ilog Pasig ang grupo ng kabataan kabilang ang biktima.

Sa hindi maipaliwanag na dahilan ay unti-unting hinihigop ng tubig ang biktima kung saan biglang naglaho sa paningin ng kanyang mga kaibigan. Kaagad namang sumaklolo ang ilang residente subalit namatay din ang biktima bago pa maiahon sa ilog.