MANILA, Philippines - Utas ang isang 27-anyos na miyembro ng Batang City Jail (BCJ) nang barilin habang naglalakad ng isa sa tatlong lalaking sakay ng dalawang motorsiklo sa Tondo, Maynila, kamakalawa ng gabi.
Dead-on-arrival sa pagamutan ang biktimang si Roberto Melgarejo, alyas Tata, ng Interior 32 Perla St., Tondo, Maynila.
Pinaghahanap naman ang tatlong suspect na nakilala lamang sa alyas na “Macmac Sumpak”, isang Jay-R Gutierrez at isang di kilalang lalaki.
Batay sa ulat, dakong alas-8:30 ng gabi nang maganap ang insidente sa panulukan ng Perla at Quirino Sts. sa Tondo, Maynila.
Naglalakad umano ang biktima at live-in partner nitong si Cheryl Hilario at kapatid na si Daisy Melgarejo nang biglang hintuan ng dalawang motorsiklo lulan ang mga suspect at saka sunud-sunod na pinaputukan ang biktima at pagkatapos ay mabilis na nagsitakas.
Posibleng atraso umano ang motibo sa isinagawang pagpaslang.