Retiradong pulis lasog sa taxi

MANILA, Philippines - Nakaligtas man sa masalimuot na buhay ng pagiging pulis­, hindi naman nakaligtas sa panganib sa kalsada ang retiradong pulis na si SPO4 Felimon Rosas matapos na mabundol ng rumaragasang taxi habang siya ay papatawid sa may East Avenue sa lungsod Quezon, kamakalawa.

Si Rosas, 73, ng Brgy. Upper Nawasa Brgy. Commonwealth sa lungsod ay agad na idineklarang patay sa nasa­bing lugar.

Arestado naman ang driver ng taxi na si Teodolfo de Leon, 45, ng Veteran Village, Brgy. Pasong Tamo sa lungsod.

Nangyari ang insidente sa may East Avenue sa lungsod ganap na alas-11 ng gabi habang tumatawid ang biktima sa naturang lugar nang biglang sumulpot ang Toyota Corolla taxi (TXK-815) na minamaneho ni de Leon na galing Elliptical Road mula Edsa at mabundol ang biktima. Sa lakas ng impact, tumilapon ng ilang metro ang biktima mula sa pinangyarihan ng pagkakabundol.

Kasong reckless imprudence resulting in homicide ang kinakaharap ngayon ng taxi driver.