MANILA, Philippines - Patay ang isang rider makaraang sagasaan ng isang bus driver na kanyang nakatalo kamakalawa ng gabi sa Quezon City.
Nakilala ang biktima na si Stephen Bacani, 27, ng Block 9, Lot 1, Asamba compound, Sitio Mendez, Brgy. Baesa sa lungsod.
Ayon sa ulat sumuko naman ang driver ng bus sa Sta Maria Bulacan PNP matapos takasan ang biktima. Ito ay kinilalang si Anthony Roadiel, 28, ng Brgy. Balasig, Sta. Maria Bulacan.
Sa inisyal na imbestigasyon, nangyari ang insidente sa may Edsa, partikular sa Fema Road, Brgy. Bahay Toro ganap na alas-6:45 ng gabi.
Sinasabing tinatahak ng minamanehong bus ni Roadiel na may biyaheng Baclaran-Metrolink ang naturang lugar nang masagi nito ang minamanehong motorsiklo (UC-5369) ng biktima.
Kapwa bumaba sa kanilang mga sasakyan ang dalawa at nagkaroon umano ng komprontasyon. Ilang sandali pa habang nasa harap umano ng bus ang biktima ay sumakay ang suspect sa bus saka pinaandar ito at sinagasaan ang biktima, saka tumakas.
Isinugod naman sa pagamutan ang biktima subalit hindi na rin naisalba ang buhay nito.
Samantala, itinatanggi naman ni Roadiel na nagkaroon sila ng komprontasyon ng biktima bago ang insidente at isa lamang itong aksidente, pero ayon sa mga awtoridad ay hinihintay pa nila ang testigong magpapatunay sa naturang alegasyon.