Trike driver dinedo ng kapwa driver

MANILA, Philippines - Dahil sa agawan sa pasahero, isang tricycle driver ang napatay sa saksak ng magpinsan na kapwa rin driver sa Caloocan City kahapon ng umaga. Nakilala ang biktima na si Rael Nimes, 32, ng Maligaya Park, Quezon City.

Pinaghahanap naman ang mga suspek na sina Tammy Dural, 40 at pinsan nitong si Mark Anthony Dural, 19, kapwa residente ng Camarin, Caloocan City.

Naganap ang insidente dakong alas-5:30 ng umaga sa kahabaan ng Cattleya St., Agape Capitol, Barangay 178, Camarin makaraang magtalo ang biktima at mga suspect dahil sa agawan ng pasahero. Agad na pinagtulungang bugbugin ng mga suspek ang biktima at   hindi pa nakuntento ay bumunot pa ito ng dalang patalim at magkatuwang na pinagsasaksak ang biktima.

Matapos ito ay mabilis na nagsitakas ang mga suspek sa hindi natukoy na direksiyon habang isinugod naman sa nabanggit na pagamutan ang biktima kung saan ay hindi na rin ito umabot ng buhay.