MANILA, Philippines - Umapela si Manila Mayor Alfredo Lim sa publiko na ituloy lamang ang suporta kay Pangulong Benigno Simeon Aquino III upang maging mabilis at maayos ang pag-unlad ng bansa.
Sa ginawang unveiling ng monumento ni dating Manila Archbishop Jaime Cardinal Sin, sinabi ni Lim na ang pagkakaluklok kay Aquino ay indikasyon na solido ang tiwala ng publiko dito kung kaya’t hindi na dapat na sayangin pa.
Ayon kay Lim, hindi kakayanin ni Aquino na solusyunang mag-isa ang dami ng problema na kinakaharap ng bansa at mga iniwan sa kanya.
Aniya, dapat na ring isantabi ang sisihan at sa halip ay ang magandang plano at proyekto ang pagtuunan ng pansin para na rin sa ikauunlad ng maraming Filipino.
Hiniling din ni Lim sa mga pari na ipagdasal na maging maayos at gabayan ang pamamalakad ni P-noy tulad na rin ng ginawang pagdarasal sa EDSA noon.