MANILA, Philippines - Isang tricycle driver, na dati umanong bilanggo, at isang 11-taong gulang na batang lalaki ang kapwa nasawi makaraang ratratin ng bala ng dalawang hindi pa kilalang suspect na magka-angkas sa isang motorsiklo sa Marikina City kamakalawa ng gabi.
Dead-on-arrival sa Amang Rodriguez Memorial Medical Center ang biktimang si Romy Sinlao, tricycle driver at residente ng Daang Bakal #126 Bagong Silang St., Parang, Marikina City, dahil sa tinamong mga tama ng bala sa iba’t ibang parte ng katawan.
Hindi na rin naisalba pa ng mga doktor ng St. Vincent Hospital ang biktimang si Lace Justin Lira, 11, ng nasabi ding lugar matapos na bawian ng buhay kahapon ng madaling-araw dahil sa tinamong tama ng ligaw na bala sa ulo.
Pinaghahanap ng mga awtoridad ang dalawang suspect na tumakas sakay ng kulay puting MIO motorcycle na walang plaka matapos ang krimen, patungo sa direksiyon ng J.P. Rizal St., Parang, Marikina City, bitbit ang .9mm pistol na ginamit sa pamamaril.
Sa report ni PO2 Mario C. Castillo, Jr., nakatalaga sa Mobile Patrol Division, dakong 10:45 ng gabi nang maganap ang pamamaril sa harapan ng bahay ng biktima.
Iginagarahe umano ng biktima ang kanyang tricycle (2195-TG) nang bigla na lang sumulpot ang mga suspect na magkaangkas sa motorsiklo at pagtapat sa biktima ay kaagad itong pinaulanan ng bala.
Sinasabing nakaupo naman sa gilid ng kalsada ang bata kung kaya’t minalas na tamaan din ito ng ligaw na bala sa ulo.
Narekober ng EPDC-SOCO Team sa lugar crime scene ang siyam na basyong bala ng kalibre .9 mm pistola.
Ayon sa pulisya, si Sinlao ay dati umanong nakulong sa hindi agad natukoy na asunto at kalalaya pa lamang.