MANILA, Philippines - Magandang balita para sa mga magkasintahan o mag-asawa na naghahanap ng matipid na gimik para sa selebrasyon ng Araw ng mga Puso bukas.
Ito ay matapos na magbigay ng gimik ang National Parks and Development Committee (NPDC) sa mga magdi-date sa Luneta Park para sa Valentines day.
Ayon kay NPDC Executive Director Juliet Villegas, na maaaring manood ng libreng concert sa Rizal park ang mga magsing irog mula alas-6 ng gabi hanggang 12 ng hatinggabi.
Bukod dito magkakaroon pa ng pa-contest para sa mga magsing-irog at mag-asawa na may pinaka-sweet na paghuhulog ng coins sa wishing fountain kung saan maaari silang manalo ng trip to Boracay, trip to Puerto Azul o trip sa isang resort sa Bulacan.
Mayroon ding inihanda ang NPDC ng isang buffet dinner sa Chinese garden sa Luneta para sa mga magde-date sa halagang P500 lamang.
Nilinaw naman ni Villegas na sa mga magsing-irog na gustong makaiwas sa mas maraming taong dadagsa sa Valentines day ay maaari na ring magpunta ngayon pa lang sa Rizal park.
Layunin umano ng kanilang paghahanda na maibalik ang imahe ng Rizal Park na isa sa pangunahing pasyalan sa buong Metro Manila.