11 katao tupok sa Navotas fire

MANILA, Philippines - Nauwi sa trahed­ya ang dapat sana’y ma­sa­­yang pagdiriwang  ng piyesta makaraang masawi ang 11 katao na halos magkakamag-anak  sa sunog habang inatake na­man ang isa pa kasabay ng pagka­tupok ng 100 ka­ba­ha­yan sa Navotas City kamakalawa ng gabi.

Kinilala ang mga bik­tima na sina William Aga­rin, Harvey Agarin, Jessie James Agarin, Jennifer Aga­rin, Jayrold Salonga, Nathalia Salonga, Angela Salonga, George Milagroso, Erick Tambor, Jerald Blancaflor, Carlito Blancaflor at habang inatake naman sa puso si Remedios Ortilla.  

Sa inisyal na imbestigasyon ni F03 Do­­mingo Gastillo, ng Navotas City Fire Department, da­­­kong alas-11:08 ng gabi nang magsimulang kumalat ang apoy mula sa bahay ng biktimang si  Milagroso, na mata­tagpuan sa Leongson Ext., Bgy. San Roque, ng nabanggit na siyudad.

Ayon sa awtoridad, na madaling kumalat ang apoy dahil gawa sa light materials ang mga bahay.

Hindi nagawang ma­­iligtas ng mga biktima ang kani-kanilang mga sarili dahil karamihan sa mga ito ay natu­tulog na nang magsi­mulang kumalat ang apoy.

Hirap din ang mga bumbero sa pag-apula ng apoy dahilan upang madamay ang ilang bahagi ng  San Roque Ele­mentary School.

Dakong alas-4:45 ka­hapon ng madaling-araw naapula ang apoy na uma­bot sa general alarm at tumupok sa may P5 milyong halaga ng mga ari-arian.

Kasalukuyan namang dinala sa eva­cuation cen­ter sa San Roque High School ang mga naging biktima ng sunog habang umaasa na la­mang ang mga ito sa ipinadadalang tulong ng lokal na pamahalaan.

Inutos naman ni Na­­­votas City Mayor John Rey Tiangco sa kanyang mga tauhan ang pagsasagawa ng Oplan Da­ma­yan upang mabigyan ng tulong ang mga biktima.