6 QC police sa kidnap, dinisarmahan

MANILA, Philippines - Tiniyak ni Quezon City Police District Di­rector Chief Superintendent Benjardi Mantele na agad nilang sisibakin sa puwesto ang anim na tauhan sa sandaling mapatunayang sangkot   sa pagdukot sa isang banyaga sa Pasay City nitong nakaraang Disyembre 20, 2010.

Nauna rito, dinisarmahan na ni Mantele ang mga tauhan na pawang miyembro ng District Anti-Illegal Drugs Task Group na idinadawit sa kaso. Ayon kay Mantele, may dinadaanan umanong proseso ang naturang problema at sa sandaling maisampa na ang kaso laban sa mga nasasangkot na pulis ay agad nilang aalisin ang mga ito sa kanilang mga puwesto.

Sa ngayon, mananatiling restricted muna umano ang mga nasabing pulis sa kanilang headquarters sa Camp Karingal at hindi pinapayagang sumama sa anumang operasyon ng kagawaran.

Sinabi ni Mantele, itinanggi umano ng mga pulis ang kanilang partisipasyon sa nasabing insidente dahil lehitimo anya ang kanilang ope­rasyon sa lugar at may koordinasyon ito sa naka­kasakop na pulis. Nagkataon lang anya na naroroon din sila nang mangyari ang insidente.

Handa naman anyang humarap sa imbes­ti­gasyon ang mga pulis ng QCPD at ipagta­tanggol nila ang mga sarili.

Nag-ugat ang isyu nang ituro ang mga pulis na suspect sa umano’y pagdukot sa isang Indian national na si James Khumar, presidente ng Khalsadiwan Indian Sect Temple­ sa UN Ave., Manila; at mga kasamahang sina Andy Bryan Ngie at Ferdinand Sales sa may kahabaan ng F.B. Harrison street sa Pasay City. Dalawa sa mga pulis ay kinilala ni Pasay Police chief Sr. Supt. Napoleon Cuaton na sina Chief Insp. Edwin Faycho at PO3 Edmon Peculdar.