Paslit lasog sa killer truck

MANILA, Philippines –  Nagkalasug-lasog ang katawan ng isang 3-anyos   na batang babae makaraang magulungan ang katawan ng dambuhalang dump truck sa lungsod Quezon kamakalawa.

Kinilala ni P/Chief Insp. Maximo Sabio, hepe ng Traffic Sector 5 ang biktima na si Danica Rose Llena, residente ng Upper  Molave St., Payatas-B,  sa lungsod.

Si Llena ay namatay habang ginagamot sa East Ave­nue Medical Center (EAMC) dahil sa mga  tinamong matinding pinsala sa katawan.

Arestado naman ang driver ng killer truck na si Norwel Belanquit, 26, nakatira sa Area B, Group 3,  Brgy. Payatas, sa lungsod.

Sa ulat ni SPO1 Nicanor Joven ng TS5, nangyari ang insidente sa may tapat ng bahay ng biktima ganap na alas 5 ng hapon.

Diumano, papagarahe na ang dump truck (UBT-337) at kumukuha ng tiyempo papaatras nang biglang madale nito ang bata na kasalukuyang naglalaro sa lugar.

Sinasabing pumailalim sa truck ang bata hanggang sa magulungan ang katawan nito dahilan para labis mapinsala ang kanyang katawan.

Hindi umano napansin ng driver na may bata sa likuran niya kung saan nalaman na lang niyang nakasagasa siya nang sabihan siya ng mga tao sa lugar.

Kasong reckless imprudence resulting in homicide ang kinakaharap ngayon ng driver.