'Kuliglig' ginagamit sa holdap

MANILA, Philippines - Bukod sa dulot na pagsi­sikip sa daloy ng trapiko, ibi­nunyag ng ilang opisyal  ng Manila City Hall na kada­lasang ginagamit sa holdap ang  mga kuliglig  kung kaya’t  dapat lamang na  ipagbawal.

Ayon sa opisyal, ang mga  kuliglig driver mismo ang siyang  taga-monitor ng kanilang bibiktimahin at saka isasagawa ang pangho­holdap sa sandaling sumakay na ang mga ito.

Kadalasan ding  iniipit  ng isa pang mga  kasamahan ang pasahero at pinapatay kung nanlalaban.

Sinabi naman ni Chief Inspector Mar Reyes, ng City Hall detachment, marami na silang natatanggap na reklamo ng panghoholdap sa mga kuliglig   subalit hindi na lamang natutuloy dahil na rin sa kawalang interes ng mga  biktima.

Samantala, sinabi naman ni  Manila Mayor Alfredo Lim na hindi naman nila inaali­san ng kabuhayan ang mga kuliglig  at sa halip ay nais lamang nilang  ipatupad ang  batas hinggil sa Clean Air Act. 

Maging siya man ay nagulat  nang malamang  umaabot na sa may 10,000 ang kuliglig na bumibiyahe sa  Maynila.

Bagama’t alam niya ang karapatan ng  mga ito, kaila­ngan din aniyang respetuhin ang karapatan ng lahat. Aniya, kung nakakadisgrasya ang mga kuliglig, hindi na ito maaaring habulin dahil na rin sa hindi nakarehistro sa Land Transportation Office.