MANILA, Philippines - Nakatakdang ipagbawal ng pamahalaang lungsod ng Makati City ang paggamit ng mga residente ng Barangay Bangkal na tinamaan ng “gas leak” ng anumang uri ng paputok sa darating na Kapaskuhan at Bagong Taon upang maiwasan ang posibleng mas malaking trahedya.
Ipinag-utos na ni Mayor Jejomar Erwin Binay sa mga opisyales ng Barangay Barangka na magpasa ng ordinansa para sa pagbabawal sa pagbebenta at paggamit ng anumang uri ng paputok at agad na ipakalat ang impormasyon sa lahat ng residente ng barangay.
Nangangamba kasi si Binay na maaaring magkaroon ng napakalakas na pagsabog sa naturang barangay kung may magpapaputok lalo na sa bisinidad ng West Tower Condominium dahil sa nababalot pa rin ng singaw ng gas ang naturang lugar.
Kasalukuyang nasa proseso pa rin ang pamahalaang lokal at ang First Philippine Industrial Corporation (FPIC) sa paglilinis ng naturang lugar at inaasahang tatagal pa bago maibalik sa normal ang hangin na kontaminado ng gas.