Day offs, leave ng MMDA kanselado ngayong Undas

MANILA, Philippines - Isang linggo bago ang All Saints Day, ipinahayag ng Metropolitan Manila Deve­lopment Authority (MMDA) na kanselado ang lahat ng “day-offs” at ba­kas­yon ng kanilang mga kawani habang nasa 1,600 traffic enforcers ang ipa­pakalat sa mga kal­sada partikular na sa mga pangunahing sementeryo.

Ayon kay MMDA Chairman Francis Tolentino inila­tag na rin nila ang kanilang “Oplan Undas” upang ma­ging maayos ang daloy ng trapiko sa Kamaynilaan mula Oktubre 29 hanggang Nob­yembre 2.

Makakatuwang ng MMDA ang mga tauhan ng Philippine National Police (PNP) at mga empleyado ng mga lokal na pamahalaan sa pagsasaayos sa daloy ng trapiko at se­guridad.

Ang mga MMDA mobile patrol at motorcycle units ay ipoposisyon naman sa mga bus terminal sa Cubao at Pasay para panatilihing ma­ayos ang pagpasok at pag-alis ng bawat bus na hindi nagdudulot ng pagsi­sikip ng trapik.

Ito’y dahil sa inaasahang milyon-milyong taga-lung­sod na lalabas ng Metro Manila patungo sa kani-kanilang mga lalawigan upang da­lawin ang kanilang mga mahal sa buhay na namayapa.

Nakaantabay rin naman ang anim na ambulansya at mga tow trucks upang tumu­gon sa oras ng mga “emergency” sa mga sementeryo at mga sasakyang titirik sa kalsada.

Samantala, ipinahayag naman ni Manila North Ce­metery administrator Ed­gardo Noriega, hindi na nila papa­yagan ang paglilibing sa Oktubre 28 habang Ok­tubre 29 naman maaring pu­masok ang mga sasakyan.

Sa Manila South Ce­metery sinabi naman ni Engr. Henry Dy na hang­gang Oktubre 28 lamang maa­aring maglinis ng mga nitso at hanggang Oktubre 29 naman maaaring papa­sukin ang mga sasakyan.

Pinaalala naman in Manila Mayor Alfredo Lim na mahigpit ang kanilang pag­babawal sa pagdadala ng mga alak at anumang mga patalim sa loob ng semen­teryo upang maiwasan ang anumang mga krimen o karahasan.