MANILA, Philippines - Patay ang isang dalagita makaraan umanong lasunin ng kanyang nobyo matapos magtalo sa Caloocan City .
Namatay habang ginagamot sa Jose Reyes Memorial Medical Center si Anjanette Ramos, 17, residente ng Palon St., ng nabanggit na lungsod.
Tinutugis ngayon ng pulisya ang nobyo ng biktima na nakilala lamang sa pangalang Jordan.
Sa pahayag nina Joan Gonzales at Jocelyn Manalastas, mga kaibigan at kapitbahay ng biktima, alas-4:00 kahapon ng umaga, lasing si Ramos nang dalhin ni Jordan sa bahay ng mga kaibigan.
Agad na umalis si Jordan pagkahatid sa dalagita kung saan nagsusuka ang biktima at sinabi sa dalawang kaibigan na nilagyan ng suspect ng silver cleaning solution ang kanyang ininom na alak dahil nagtatalo ang mga ito.
Dahil dito, agad na dinala nina Gonzales at Manalastas ang biktima sa JRMMC subalit namatay din ito na naging dahilan upang magsumbong sa mga pulis ang kanyang mga kaibigan.
Kasalukuyan nagsasagawa ng imbestigasyon ang mga pulis upang matukoy ang tunay na ikinamatay ng biktima.