MANILA, Philippines - Patay sa pagpapakabayani ang isang lady barker nang pagsasaksakin ng isang holdaper na kaniyang kinunan ng litrato habang nagsasagawa ng panghoholdap sa Tondo, Maynila kamakalawa ng gabi.
Dead on arrival sa Jose Abad Santos Mother and Child Hospital ang biktimang si Emma Chacon, 38, ng Coral St., Tondo sanhi ng saksak sa likurang bahagi ng kanyang katawan.Tinutugis pa ng pulisya ang di nakilalang suspect.
Sa ulat ni Det. Lester Evangelista ng Manila Police District-Homicide Section, dakong alas-6:15 ng gabi ng maganap ang insidente sa panulukan ng J. Abad Santos at C. M Recto Ave., Tondo.
Nagawa pa umanong pagsabihan ng biktima ang suspect na “huwag kang mangholdap dito kundi pahuhuli kita sa mga pulis” sabay na kinunan umano ng litrato gamit ang kaniyang cellphone.
Nang mapansin ng suspect na walang kasama ang biktima ay nilapitan umano ito at biglang pinag-uundayan ng saksak bago tumakas.
Ang suspect ayon sa nakalap na impormasyon ng imbestigador ay minsan nang nakulong sa MPD-Station 2 dahil din sa panghoholdap. Hindi pa ito kinilala ng pulisya para sa gagawing operasyon.