MANILA, Philippines - Habambuhay na pagkakulong ang ipinataw na parusa ng Parañaque Regional Trial Court sa dalawang lalaking tulak ng iligal na droga na nadakip tatlong taon na ang nakararaan. Sa siyam na pahinang desisyon ni Parañaque RTC Judge Danilo Suarez ng Branch 259, napatunayan na walang dudang nagkasala sa kasong paglabag sa Section 5 Article II ng Republic Act 9165 o Dangerous Drug Act ang mga akusadong sina Benjie Quiroba Aguillon at Roderick Tulang Flores matapos madakip sa aktong nagbebenta ng 0.04 gramo ng methamphetamine hydrochloride na kilala bilang shabu. Bukod sa habambuhay na pagkabilanggo, inatasan din ng hukuman ang mga akusado na magbayad ng tig-P500,000 bawa’t isa bilang multa. Batay sa rekord ng korte, nadakip ng mga awtoridad, kabilang ang mga tauhan ng Taguig City police sina Aguilon at Flores sa Kobe St., KKK Subdivision matapos magbenta ng shabu na nagkakahalaga ng P1,000 sa pulis na nagpanggap na buyer.