MANILA, Philippines - Patay ang isang bagitong pulis makaraang pagbabarilin ng isang grupo ng armadong kalalakihang pinaniniwalaang mga carjacker kamakalawa ng gabi sa Quezon City.
Nakilala ang nasawing parak na si PO1 Efren Jacobo, nakatalaga sa Police Mobile Force ng QCPD.
Naganap ang insidente dakong alas-10 ng gabi sa kahabaan ng Mindanao Avenue habang ang biktima ay lulan ng kanyang motorsiklo nang bigla na lamang asintahin at barilin ng isa sa mga suspect na sakay naman sa isang Honda Civic.
Dead-on-arrival sa Quezon City General Hospital si Jacobo.
Narekober ng pulisya ang isang Honda Civic na basta na lamang iniwan ng mga suspek sa naturang lugar.
Sa paunang pagsisiyasat ng pulisya, posibleng inakala ng mga suspect na hinahabol sila ng pulis kung kaya inunahan na ito ng putok ng baril na na ging sanhi ng kanyang kamatayan.
Patuloy pa rin ang isinasagawang imbestigasyon sa insidente.