MANILA, Philippines - Wakwak ang ulo at mukha ng isang 38- anyos na lalake matapos na pagtatagain ng hindi nakikilalang salarin sa loob ng binabantayan niyang lupa sa lungsod Quezon kahapon ng madaling araw.
Ang biktima ay kinilalang si Gay Lambert King, 38, caretaker at residente ng 20 Felipe St., Brgy. Damayan, San Francisco Del Monte sa lungsod.
Sa ulat ng Quezon City Police, ang biktima ay natagpuan na lamang nakahandusay at naliligo sa sarili nitong dugo sa binabantayan niyang lote sa no. 20 Vicente St., ng nasabing Brgy. ganap na alas-2:30 ng madaling-araw.
Ayon naman sa mga residente, wala naman silang alam na kaaway ang biktima para gawin ang nasabing pagpatay.
Patuloy ang pagsisiyasat ng awtoridad sa nasabing insidente.