5 high school students sugatan sa rally

MANILA, Philippines - Nasugatan ang limang high school students ma­ka­raang piliting makapa­sok sa main building ng Deparment of Education (DepEd) at makipagpam­buno sa mga security guards ng ahensya, ka­hapon ng umaga.

Sa impormasyong ipi­nadala ng League of Fili­pino Students (LFS), kini­lala ang mga estud­yan­teng isinugod sa Rizal Me­dical Center dahil sa sugat sa ulo sina Ronald Santos, Mark Gil Gamido, Ivan Bon­torostro, Ray­mond Ubero, at James Anajao. Nag­dugo naman umano ang tenga ni Anna Tolentino nang ma­sun­tok sa ulo habang pino­sasan si Ronald Gustillo.

Dinala rin naman sa naturang pagamutan ang ilang security guard ng DepEd na nagtamo rin ng mga sugat nang pagtulu­ngang gulpihin rin ng mga raliyistang kabataan na may kasamang ilang mga matatanda na namumuno sa kanila.

 Sinabi ni Kenneth Tirado, public information office head, dakong alas-11 ng tanghali nang maka­pasok sa compound ng ahensya ang mga raliyista at nagtipun-tipon sa tapat ng main building kung saan inumpisahan ang kilos-protesta. 

Inumpisahan umano ng mga raliyista ang pagi­ging bayolente nang itulak at tapikin ang “glass window” ng gusali. Dito na pinilit na palayuin ng mga guwardiya ang mga rali­yista sa pangamba na ma­basag ang salamin ngunit isa umano sa mga raliyista ang nag-umpisang ma­nun­tok hanggang sa mag­kagulo na.

Nakatakda namang mag-counter file ng kaso ang magkabilang grupo ng mga raliyista at mga secu­rity guards na nasaktan sa insidente.

Sinabi ni Tirado na po­sibleng rebisahin nila nga­yon ang ipinapatupad na seguridad ng DepEd dahil sa malayang nakakapasok ang mga raliyista sa com­pound at nakakapagrally sa tapat ng main building. Ayon sa mga guwardiya na nakapanayam ng PSN, nagpapanggap umano na magkamag-anak na estud­yante at magulang ang mga raliyista na may isa­sangguni sa DepEd, paisa-isang papasok sa com­pound saka magsasama-sama at mag-uumpisa ng rally dala ang mga pla­cards na itinago sa ka­nilang mga bag.

Ayon sa mga raliyista, ilang beses na silang pa­balik-balik sa DepEd upang humingi ng dayalogo sa mga opisyal ng ahensya ukol sa iligal na paniningil sa kanilang mga pa­aralan ngunit hindi sila pinaki­kinggan.