MANILA, Philippines - Bala sa dibdib ang natamo ng isang 35-anyos na lalaki matapos umawat sa away ng dalawang lalaking lasing sa Tondo, Maynila, kamakalawa ng hapon.
Dead-on-arrival sa Metropolitan Medical Center ang biktimang si Roderick David, 35, binata empleyado at residente ng Paulino St., Balut, Tondo.
Nakatakas naman ang suspect na kinilalang si Da niel Lusong, 27, may-asawa at residente ng Mayhaligue St. Tondo, Maynila.
Sa ulat ni Det. Danilo Vidad ng Manila Police District-Homicide Division, dakong alas-5 ng hapon nang maganap ang insidente sa Mayhaligue St., sa gilid lamang ng Metropolitan Medical Center.
Nabatid na hindi magkakilala ang biktima at suspect.
Sa imbestigasyon, bisita lamang ang biktima ng isang Daniel Aguilar, na residente sa lugar at nag-iinuman ang dalawa sa labas ng bahay nang dumating umano ang suspect na si Lusong na lasing na rin umano at kinompronta si Aguilar.
Hindi naman umano nagpabaya ang biktima kaya inawat ang dalawang halos magsuntukan na hanggang sa umuwi na ang suspect na si Lusong.
Hindi nagtagal ay bumalik umano si Lusong na armado ng ’di nabatid na kalibre ng baril at biglang nagpaputok sa ere na ikinagulat ng mga residente.
Kasunod nito ay ang pagbaril niya sa biktima na tumama sa kaliwang dibdib nito. Mabilis na dinala sa katabi lamang na pagamutan ang biktima na idineklarang dead-on-arrival.
Posibleng napikon umano ang suspect sa pag-awat ng biktima kaya siya ang pinagbalingan.
Patuloy naman ang isinasagawang pagtugis sa suspect.