MANILA, Philippines - Patay ang isang ginang matapos barilin ng isa sa dalawang hindi pa nakikilalang lalaki habang ang una ay umiigib ng tubig sa Valenzuela City kahapon ng umaga. Dead-on-arrival sa Valenzuela General Hospital sanhi ng tama ng bala sa kaliwang bahagi ng mukha si Jackie Lou Dalida, 26 ng T. Santiago St., Lingunan ng lungsod. Sa imbestigasyon ng pulisya, naganap ang insidente dakong alas-7 ng umaga habang umiigib ng tubig sa kanilang kapitbahay ang biktima nang sumulpot ang isa sa mga suspek at agad putukan si Dalida. Matapos ang insidente ay sumakay ang suspek sa naghihintay na kasama dala ang isang motorsiklong hindi na nakuha ang plaka bago nagsitakas. Inaalam pa ng pulisya ang posibleng motibo sa isinagawang pagpaslang sa ginang.