Gas leak sa Makati: 60 pamilya inilikas

MANILA, Philippines – Tuluyang inilikas ng mga tauhan ng Bureau of Fire Protection (BFP) at Makati Health Office ang nasa 60 pamilya na nani­nirahan sa West Tower Condominium sa natu­rang lungsod bun­sod ng malaking panga­nib na naka­amba sa kanilang buhay dahil sa nadiskub­reng gas leak sa base­ment ng gusali.             

Nagkusa naman na lumikas na rin ang mga residente na nakatira sa paligid ng gusali na nasa Osmeña High­way, Brgy. Bangkal da­hil sa nakaka­sulasok na amoy dulot ng tuma­tagas na kulay dilaw na likido.             

Galit na itinuturo ng mga residente ng condo building na posibleng nanggaling ang leak sa Ba­tangas-Pandacan pipe­line na pinama­maha­laan ng First Phi­lippine Industrial Corpo­ration. 

May 10 araw na nang unang madis­kubre ng mga residente ang una’y manaka-nakang pagta­gas ng likido hanggang sa tu­luyang lumakas na ito nitong nakaraang Mi­yer­kules.

Hiniling ng mga ito sa FPIC na pansaman­ta­lang i-shutdown ang ka­nilang operasyon upang mapi­ gilan ang pagtagas ha­bang ka­ilangang ma­hukay na agad ang pipe­line at ma­tukoy kung saan nang­ga­galing ang tagas.             

Personal na nag-ins­peksyon naman sa lugar si Makati Mayor Junjun Binay kung saan ipinag-utos nito ang ibayo pang pagpapa­bilis sa imbes­tigasyon upang matukoy kung saan nagmumula ang tagas. 

Nagpamahagi na rin ng gas mask ang Ma­kati City Hall sa mga apek­ta­dong residente habang kinordon na ang base­ment ng gusali na idi­nek­larang hot zone.            

Ayon sa BFP-Makati fire marshall, Supt. Sa­muel Tadeo, “highly com­bustible” ang tuma­tagas na likido at ma­aaring sumabog o mag­karoon ng malakihang sunog kung may mani­nigarilyo o magsisindi ng apoy sa ikaapat at ikalawang palapag ng basement ng gusali.             

Sa kabila nito, sinabi naman ni FPIC Pipeline Right of Way division head, Engr. Efren Im­presso na hindi sa ka­nilang pipeline nangga­galing ang tagas ma­ka­ra­ang mahukay nila ang tubo sa harapan ng gu­sali at makitang wala kahit anong tagas ito.