MANILA, Philippines - Uminom muna ng alak, pagkatapos ay nagkape, bago damputin ang isang kumot at idinugtong ang seatbelt saka nagbigti ang isang binata sa loob ng kanyang tinutuluyan sa lungsod Quezon, ayon sa pulisya kahapon.
Ayon sa homicide section ng Quezon City Police, wala naman umanong nabanggit na rason ang kaanak ng biktima upang magbigti si Gilbert Gaona, 32, maliban sa kawalan nito ng trabaho.
Sa pagsisiyasat ni PO3 Modesto Juanson, ang nakabigting biktima ay natuklasan ng kanyang kapatid na si Girlie Goana-Fuentes sa may ikalawang palapag ng kanilang bahay sa 150-K 10th St., Brgy. East Kamias ganap na alas-9:30 ng gabi.
Sinasabing bago ang insidente ay nakipag-inuman muna umano ang biktima sa ilang ka-lugar at nang malasing ay nagpaalam itong uuwi ng bahay para uminom ng kape.
Matapos makapasok ng bahay ang biktima ay hindi na ito nakita pang muli kaya naman pagpunta ni Girlie sa bahay na tinutuluyan ng kapatid ay bumulaga sa kanya ang una na nakabitin sa kisame.
Sa pagsisiyasat ng Scene of the Crime Operatives (SOCO), wala namang nakitang ibang bakas ng sugat sa katawan ng biktima maliban sa galos sa leeg nito dahilan sa sinturon na itinali niya rito.