MANILA, Philippines - Pinaniniwalaang nakadispalko ng pera ang isa sa mga motibong iniimbestigahan ng pulisya matapos pagbabarilin at mapatay ang isang ginang ng tatlong kalalakihan kamakalawa ng hapon sa Caloocan City.
Dead-on-the-spot sanhi ng dalawang tama ng bala sa ulo ang biktimang nakilalang si Avelyn Buenaventura, 38, ng Sta. Ana St., Malabon City.
Habang sinusulat ang balitang ito blangko pa ang pulisya sa suspek ni Buenaventura.
Nabatid sa imbestigasyon ng pulisya, naganap ang insidente dakong alas 3:00 ng hapon sa loob ng Bonifacio Market, Caloocan City. Naglalakad umano ang biktima, nang lapitan ng mga suspek kung saan isa sa mga ito ang sumabunot muna sa biktima bago pinagbabaril ng isa pa sa mga ito.
Nabatid kay Chief Insp. Marcelo Mariano, hepe ng follow-up division ng Caloocan City Police na nakatanggap sila ng impormasyon na nakadispalko ng malaking halaga ang biktima sa isang kaibigan nito na hindi muna pinangalanan na posibleng nagpapatay kay Buenaventura.