Messenger patay sa P1.5-milyon holdap

MANILA, Philippines - Isang dating pulis na naka­talaga sa Manila Police District-Station 5 ang isa sa itinuturong holdaper na pu­matay sa messenger ng isang money changer na inagawan ng P1.5 milyon matapos mag-withdraw sa isang mataong lugar, sa panulukan ng Mabini at Pedro Gil. Sts., Ermita, Maynila, kama­kalawa ng hapon.

Matapos barilin ay isinu­god sa Medical Center Manila ang biktimang si Omar Hassan, messenger ng Lady Diamond Money Changer at residente ng   Padre Faura St., Ermita, Manila subalit idinek­la­rang dead-on-arrival.

Ayon kay Sakit Ibrahim, saksi at driver ng nasabing money changer ang posi­tibong kumilala sa isa sa suspect na bumaril at kumuha ng salapi nang ipakita sa kanya ang photo gallery sa MPD headquarters.

Kinilala ni C/Insp Erwin Margarejo ang dating pulis na hinihinalang mastermind sa holdapan na si PO2 Gauden­cio Patek.

Si Patek, batay sa beripi­kasyon ay may nakabinbing warrant of arrest sa kasong kidnapping at homicide sa  Branch 219 ng Quezon City Regional Trial Court.

Kabilang din umano si Patek sa talaan ng PNP most wanted kidnapper na may patong sa ulo na P275,000.

Sa ulat ni Det. Jonathan Bautista ng MPD-Homicide Section, naganap ang insi­dente dakong alas-4:30 ng hapon, sa tapat ng Hyatt Hotel sa P. Gil at Mabini sts.

Galing umano sa pagwi-withdraw ang mga biktima lulan ng Nissan Patrol (THL 906) na kulay pula, at habang ipinaparada ang kotse sa harapan ng Hyatt Hotel upang ihatid ang pera sa Lady Dia­mond Money Changer  nang lapitan ng mga suspect na armado ng baril at nagdeklara ng holdap.

Sa pagkataranta ng bik­timang si Hassan ay lumabas ito ng sasakyan at nagtatakbo sa direksiyon ng Hyatt Hotel upang humingi ng saklolo subalit sinundan siya ng isa sa suspect at pinagba­baril sa likurang bahagi ng kanyang katawan.

Pagbagsak ng biktima, sumunod naman ang isa pang suspect  at kinuha ang isang kulay itim na knap sack na hawak ni Hassan kung saan nakasilid ang P1.5 milyon.

Bago tumakas ang mga suspect ay pinaputukan muna ang gulong ng nasabing sa­sakyan saka sumakay ng kanilang get away motorcycle at tumakas sa direksiyon ng Pedro Gil St.