Pumito kapag may krimen: Estudyante sa Metro Manila 'aarmasan'

MANILA, Philippines - Sinimulan na kahapon ng National Capital Region Police Office (NCRPO) ang pamamahagi ng libu-libong mga pito sa mga estud­yante na magagamit ng mga ito laban sa masa­samang elemento kaugnay ng pagbubukas ng klase ngayong araw (Hunyo 15).

Sa panayam ng PNP Press Corps  kay NCRPO Spokesman Supt. Rommel Miranda, ang pamumud­mod ng mga pito sa mga estudyante ay bilang ba­hagi ng pinalakas na anti-criminality drive ng kapu­lisan sa Metro Manila.

“For students, we will be distributing whistles,” ani Miranda sa pamumudmod ng mga pito  ng NCRPO mula sa mga donasyon ng Non Government Organizations (NGOs).

“NAPOLCOM has been distributing already. We have distributed in some schools, we will continue tomorrow (June 15) up to the end of the first week of school classes. It came from us (NCRPO) and from some civilian organizations,” ani pa ni Miranda.

Nauna nang inihayag ni NCRPO Chief Director Roberto Rosales na mag­de-deploy sila ng 8,000 pulis sa mga university belt at iba pang lugar habang isina­ilalim na rin sa full alert status ang puwersa ng pulisya sa Metro Manila sa nasabing Oplan Balik Eskwela.

Ayon kay Miranda sa pamamagitan ng mga pito ay maaaring matulungan ng mga testigo ang mga po­ten­ syal na biktima ng masa­samang elemento sa pama­magitan ng pagpito para makaagaw ng aten­syon.

Inihayag nito na ang pito ay isang epektibong pa­raan para mabilis na maka­saklolo ang mga awtoridad na magpapatrulya sa bisinidad ng mga paaralan.

Ayon kay Miranda hindi lamang sila basta mami­migay ng mga pito kundi babahaginan rin nila ng impormasyon ang mga estudyante kung paano makakaiwas at makaka­tulong sa pagsawata ng kriminalidad.