MANILA, Philippines - Patay ang isang taong-gulang na batang babae matapos na malunod sa isang baldeng puno ng tubig sa lungsod Quezon kahapon ng umaga.
Nakilala ang nasawi na si Nicole Mahilum, ng Dagot St., Brgy. Manresa sa lungsod.
Sa ulat ng Criminal Investigation and Detective Unit ng QCPD, nangyari ang insidente sa may 142 Dagot St., Brgy. Manresa ganap na alas-5:30 ng umaga.
Sinasabing ang bata at step-sister nitong si Judy Ann, 12, ay naiwang magkasama sa loob ng kanilang bahay nitong Miyerkules ng gabi.
Ayon sa tatay ng biktima na si Joel, iniwan niya ang dalawang anak na natutulog sa loob ng kanilang bahay ganap na alas-11:30 ng gabi habang siya naman ay namasada.
Ang nanay naman ng mga bata ay nagpunta sa Bohol kung kaya walang naiwan sa mga bata ito.
Nabatid na ang biktima ay anak umano ni Joel sa ibang babae at iniwan sa pangangalaga niya.
Sa panayam naman ni PO3 Jaime Jimena, ng CIDU kay Judy Ann, sinabi nito na natagpuan niya ang kapatid sa loob ng isang baldeng puno ng tubig nang magising siya ng nasabing oras.
Naniniwala ang pulisya na posibleng hindi namalayan ni Judy Ann na tumayo ang bata sa higaan at nagtungo sa kubeta saka naglaro ng tubig sa balde at napasubsob sanhi ng insidente.
Nagawa pang maisugod sa Sta. Teresita Hospital ang biktima ngunit idineklara rin itong patay dahil ayon sa doktor, ang baga umano nito ay napuno na ng tubig dulot ng pagkalunod.
Inaalam naman ng awtoridad kung dapat na papanagutin ang magulang ng bata sa nasabing insidente.