MANILA, Philippines - Pinagtulungan saksakin at tagain hanggang sa mapatay ng tatlong magkakapamilya ang nakaaway nilang kapitbahay sa harap mismo ng ina nito, kamakalawa ng gabi sa Las Piñas City.
Nakilala ang nasawi na si Joey Enriquez, 27, ng Block 28 Lot 12 Phase 3 Saint Louie Village, Talon 3, Las Piñas habang agad na nagsitakas ang mga salarin na nakilala lamang sa mga pangalang Tony, Jigs at Nonoy Genabe, residente rin ng naturang village.
Sa ulat ng pulisya, naganap ang krimen dakong alas-8:30 ng gabi nang pasukin ng mga salarin na armado ng patalim at itak ang loob ng bahay ng biktima at pagtulungan itong pagsasaksakin at tagain sa harap ng 47-anyos nitong ina na si Teresa.
Hindi pinakinggan ng mga suspek ang palahaw at pagmamakaawa ng ina ng biktima hanggang sa matiyak na wala na itong buhay.
Sa inisyal na imbestigasyon, isang matagal na umanong alitan ang dahilan ng naturang pamamaslang kung saan inaalam pa ng mga imbestigador ang puno at ugat nito.