MANILA, Philippines - Uminom muna ng dalawang bote ng beer bago umakyat sa terrace saka nagpakamatay sa pamamagitan ng pagbigti sa sarili ang isang 19-anyos na binata na iniulat kahapon.
Kinilala ang nasawi na si Jay Mark Rerela, delivery boy ng Mendoza St., Brgy. Paltok sa lungsod.
Ayon sa pulisya, bukod sa nakita nilang uminom muna ng alak, wala anyang alam ang mga kaibigan nito kung ano ang dahilan at bakit ito nagpakamatay dahil wala naman daw itong naikukuwento sa kanilang problema.
Ganap na alas-9 ng gabi nang matagpuan ang biktima ng kasamahan sa trabaho na si Nathaniel Agpaoa, habang nakabitin sa may kisame ng terrace ng tinutuluyan nito.
Huling nakitang buhay ang biktima ganap na alas-8:30 ng gabi habang mag-isang umiinom sa tapat ng kanilang bahay.
Sa ngayon, inaalam pa ng awtoridad kung may foul play na naganap sa nasabing insidente.