MANILA, Philippines - Sampung araw bago maghalalan, inaasahan na ni Liberal Party mayoralty bet at Quezon City Vice Mayor Herbert “Bistek” Bautista na mas maraming “fabricated stories” at “black propaganda” ang lalabas laban sa kanya mula sa kanyang katunggali sa pagka-alkalde.
Sinabi pa nito na kilala ang kanyang kalaban na mahusay magpalabas ng mga imbentong kuwento at maling akusasyon upang siya ay sirain sa publiko gamit ang impluwensya at salapi.
Tila desperado na umano ang kanyang kalaban kaya pilit nitong dinudungisan ang sistema ng pulitika sa siyudad.
Noong nakaraang linggo, kinondena ng women’s partylist group GABRIELA at Bayan Muna ang ginawang pagsisinungaling ng grupo ni Mike Defensor hinggil sa umano’y pagsuporta ng militanteng grupo sa kanyang kandidatura, habang noong nakaraang Pebrero naman ay naglabas ang kampo nito ng pekeng poll survey na ikinagalit naman ng independent polling firms na Pulse Asia at Social Weather Stations (SWS).