Walang pambayad sa placement fee: Job applicant nagbigti

MANILA, Philippines - Isang aplikante sa isang trabaho ang nagpatiwakal sa pamamagitan ng pagbigti sa sintas ng sapatos ka­hapon ng umaga dahil sa pagkabigo niyang maka­likom ng pera para maka­punta sa ibayong-dagat.

Nakilala ang biktima na si Rolando Garin, tubong Ca­gayan at nanunuluyan pan­samantala sa isang transient house sa Malate, Manila.

Natagpuang nakabigti ang bangkay ni Garin sa isang banyo ng transient house sa 956 San Andres St., Malate.

Dakong alas-8:00 ng umaga nang matagpuan ang bangkay ng biktima ng isa pang boarder.

Sa naging pahayag ng isang Evelyn Magsayo, boarder, una umanong na­takot siya sa nakitang naka­tayong lalaki sa loob ng CR dakong alas-3:00 ng ma­daling-araw kaya nagta­takbo siya papasok ng kani­yang silid at nagsara ng pinto.

Bandang alas-8:00 ng umaga, sa paggising niya ay sinilip ulit ang CR at nakita niya muli ang biktima na nakatayo pa rin at inakala niyang sina­ sapian ng masa­mang espiritu dahil hindi tumitinag.

Kumuha umano siya ng dalawang rosary bilang pa­ngontra umano sakaling sina­sapian ng masamang espiritu ang boardmate.

Subalit maya-maya ay napansin na niya umano na nakabitin pala ito sa sintas ng sapatos na hindi niya napan­sing nakapulupot sa leeg ng biktima.

Sabi pa ni Magsayo na ang alam niya ay makaka­alis na patungo sa Malaysia sa Abril 29 ang biktima subalit prob­lema pa umano nito na punuan ang kaku­langang P30,000. sa placement agency.

Kamakalawa ng hapon ay nagkwento rin umano ito na kailangang umuwi siya sa Cagayan para makautang ng P30,000.