MANILA, Philippines - Tatlong Chinese national na pinaniniwalaang miyembro ng drug syndicate ang naaresto ng mga tauhan ng National Capital Regional Police Office (NCRPO)-Regional Anti-Illegal Drugs Special Operations Task Group sa isang operasyon sa Parañaque City kamakailan.
Kinilala ni NCRPO chief, Director Roberto Rosales ang mga nadakp na sina Sunxiao Xu, alyas William Chua, 25, ng Peru St., Better Living, Parañaque; Wenxian Hong, alyas Andy Hong, 32; Xiuqin Shi, alyas Kim Sy, 29, kapwa naninirahan rin sa nabanggit na lugar.
Nabatid na nagsagawa ng buy-bust operation ang RAID-SOTG noong Linggo sa Doña Soledad, Better Living, Parañaque makaraang makumpirma ang operasyon ng naturang grupo.
Nakumpiska sa naturang operasyon sa mga suspek ang 7.5 kilo ng hinihinalang shabu na may “street value” na P30 milyon at 20 pirasong P1,000 marked money na ginamit sa boodle money.
Ayon kay Rosales, si William Chua ay nakilala bilang isa sa maintainer ng shabu laboratory sa Cainta, Rizal na sinalakay ng pulisya noong 2009.
Nahaharap na ngayon sa mga kasong paglabag sa Republic Act 9165 o Dangerous Drugs Act of 2002 ang mga naturang dayuhan.