MANILA, Philippines - Talamak na naman umano ang non-appearance sa emission testing ng mga sasakyan na ipinarerehistro sa Land Transportation Office. Ayon sa Coalition of Clean Air Advocates, noong isang taon lamang ay halos mawala na nang tuluyan ang non-appearance sa mga “self-regulation measures” sa tulong ng mga PETC IT Providers upang kusang malinis ang kanilang industrya.
Ngunit nang magpalabas ang dating LTO Chief Arturo Lomibao ng isang kautusan na nagpapahintulot sa IT nito na Stradcom Corporation na mag-direct connectivity sa mga PETCs, muli na namang dumami ang mauusok na sasakyan dahil sa Non-appearance operation ng mga tiwaling PETCs na pinapayagan ng sistema ng Stradcom.
Ayon kay Herminio Buerano Jr., presidente ng CCAA, ang pagbalewala ng Stradcom sa kanilang panawagan ay isa lamang patunay na ang Stradcom ay walang pakialam sa mga layunin ng Clean Air Act.