Paglipat sa Taguig sa mga Ampatuan, tinanggihan

MANILA, Philippines - Matigas ngayon ang pagtanggi ng pamahala­ang lungsod ng Taguig sa paglipat kay Maguindanao masaker suspek Datu Unsay Mayor Andal Ampa­tuan Jr. sa Camp Bagong Diwa Jail mula sa National Bureau of Investigation detention cell.

Tinawag ni Taguig City Mayor Freddie Tinga na “clear and present danger” o malaking banta sa ka­payapaan ang paglilipat sa mga Ampatuan sa lung­sod.

Ito’y makaraang ipag-utos ng Korte Suprema ang paglilipat kay Ampa­tuan Jr. sa Camp Bagong Diwa Jail na pinamama­halaan ng Bureau of Jail Management and Peno­logy (BJMP) saTaguig City. Ito’y dahil bagong “renovate” ang gusali kung saan naroroon na rin ang espesyal na korte na di­dinig sa kaso ng mga Am­patuan kaugnay ng ma­saker sa Maguin­danao.

Ikinatwiran naman ni Tinga na may 200 metro lamang ang Camp Bagong Diwa sa Brgy. Maharlika, isa sa pinakamalaking Mus­lim community sa bansa, na maaaring mag­dulot ng kaguluhan sa mga residente.        

Ipinaliwanag pa ni Tinga na noong 2001, sa kabila ng pagkontra nila sa pag­lilipat sa mga miyem­bro ng Abu Sayyaf na iku­long ang mga ito sa Camp Bagong Diwa ay itinuloy ito. Noong Marso 2005, isang tang­kang “jail break” ang na­ganap kung saan naging marahas at ma­dugo ang engkuwentro sa pagitan ng mga rebeldeng preso at mga pulis.