MANILA, Philippines - Dahil sa problema sa buhay, isang 23-anyos na binata ang nagpakamatay sa pamamagitan ng pagbibigti sa kanyang sarili kahapon sa Quezon City.
Nakilala ang nasawi na si Jaymar Enciso, 23, stay-in houseboy, ng Urbano St., Brgy. Bagbag ng nabanggit na lungsod
Base sa ulat, nadiskubre ang pagpapatiwakal ng biktima dakong alas-2 ng madaling-araw sa nasabing bahay.
Nauna rito, ginising ang kasambahay na si Sopia Balano ng family driver na si Alfredo Sarino upang dalhin sa San Lazaro Hospital ang kanilang amo.
Sinasabi pang matapos buksan ang gate ng bahay at maisara ito ni Balano, pumasok siya sa kanilang quarters at dito laking gulat nito dahil nakabitin na si Enciso sa iron grill gamit ang isang itim na kable na ipinulupot sa kanyang leeg.
“Walang suicide note pero sabi ni Balano matapos silang maghapunan ng alas-11 ng gabi nasabi sa kanya ng nasawi na ‘baka di na tayo magkita-kita at bigla na lamang akong mawala’. Dahil dito ay hindi na nga natuloy na dalhin sa pagamutan ’yung amo nila”, ayon pa sa pulisya.
Sinasabing may dinadalang problema ang biktima sa hindi malamang dahilan na malamang umanong dinamdam nito kaya nagpasyang magpakamatay.
Gayunman, ang kasong ito ay patuloy na iniimbestigahan ng pulisya para malaman kung mayroon o walang foul play sa pagkamatay nito. (Angie dela Cruz)