MANILA, Philippines - Dalawa katao ang iniulat na nasawi sa magkahiwalay na aksidente sa lungsod Quezon, ayon sa ulat ng pulisya kahapon.
Sa ulat na nakarating sa Traffic Sector 3 ng Quezon City Police sa Camp Karingal, nakilala ang mga nasawi na sina Gomer Philip Abrecino III, 21, estudyante at Joel Cunanan.
Lumilitaw sa imbestigasyon na unang naging biktima ay si Abrecino habang sakay ito ng kanyang Honda motorcycle (ZL-9933) at mabundol ng isang Mitsubishi Adventure (TYM-409) na minamaneho ni Felix Napiza, 42, sa kahabaan ng Regalado Avenue at Mindanao Avenue Extension, Brgy. Lagro Novaliches ganap na ala-1:20 ng hapon.
Sa pagkakabundol sa biktima, tumilapon ito ng ilang metro bago bumagsak sa gitna ng kalsada hanggang sa masagasaan pa ang katawan nito ng dumarating na Hino passenger bus (NYL-245) na minamaneho naman ni Ronal Robes, 35. Patay agad si Abrecino sa nasabing lugar.
Ganap na alas-7 ng gabi naman nang mabundol at masagasaan ng rumaragasang bus si Cunanan sa may panulukan ng EDSA sa Bansalangit St., Brgy. Veterans Village, sa lungsod.
Ang Rebuilt bus (TYL-313) na minamaneho ni Samuel Tubal, 44, may-asawa ng Block 10, Lot 26-B, Maryland Homes, Landayan San Pedro Laguna ay tinatahak ang nasabing lugar nang mahagip at masagasaan pa ang biktima.
Ayon sa pulisya, tumalon umano ang biktima mula sa footbridge sa nasabing lugar, hanggang sa tumama ito sa paparating na bus at masagasaan pa sanhi upang labis na mapinsala ang ulo nito at mamamatay.
Nakapiit ngayon sa himpilan ng PS3 ang mga sus pect sa nasabing insidente para sa paghahanda sa kasong kakaharapin nila sa piskalya. (Ricky Tulipat)