MANILA, Philippines - Arestado ang tatlong kilabot na magnanakaw ng motorsiklo matapos na maispatan sa lungsod Quezon kahapon ng madaling-araw.
Kinilala ang mga nadakip na sina Mark Ian Torres, 31; Oliver Ocampo, 30 at Michael Franco, 31, pawang naninirahan sa Petronia St., Novaliches sa lungsod.
Ayon sa pulisya, nadakip ang mga suspek matapos na tangkain ng mga itong agawan ng SYM magic motorcycle (OZ-8385) ang biktimang si Anthony Dio 27, residente ng Brgy. Villa Sambina sa lungsod.
Nangyari ang insidente malapit sa tirahan ng biktima pasado alas -2 ng madaling-araw.
Diumano, nagpapatrulya ang mga awtoridad sa lugar nang mapuna nila ang mga suspek na nakikipambuno sa biktima habang inaagaw ang motorsiklo ng huli.
Dahil dito, agad na sinaklolohan ng mga pulis ang biktima at naaresto si Franco, habang nakatakas naman ang mga kasamahan nito. Sa interogasyon, inginuso ni Franco ang mga kasamahan kung kaya sa follow-up operation ay nadakip rin ang mga ito. (Ricky Tulipat)