MANILA, Philippines - Isang 47-anyos na binatang miyembro ng Batang City Jail na si Noel Cruz ang ipinaaresto sa pulisya dahil sa pagpapakita ng kanyang ari at panghihipo sa dibdib ng isang 11-anyos na dalagita sa Quinta Market, Quiapo, Manila kamakalawa ng hapon.
Sinabi ng biktimang itinago sa alyas na Kristine na lasing na lasing si Cruz nang harangin at paghihipuan siya nito sa loob ng naturang palengke.
Bago naganap ang insidente, nakita si Cruz na nagwawala dahil sa kalasingan na madalas umano niyang gawin.
Kasunod nito, hinarang ni Cruz si Kristine na pupunta sana sa isang tindahan at pinakitaan ng kaniyang ‘ari’ kaya natakot at iniwasan nito ng biktima.
Hindi akalain ng dalagita na hahabulin siya at paghihimasin ang kaniyang dibdib ng suspek.
Inireport ng mga magulang ng biktima sa pulisya ang insidente kaya naaresto ang suspek na ipinagharap ng kasong paglabag sa Acts of Lasciviousness in relation to RA 7610 at Indecent show in public place. (Ludy Bermudo)