3 buwang kulong ipinataw ng korte sa Bise at 7 konsehal

MANILA, Philippines - Pinatawan ng paru­sang tatlong buwang pagkakulong ng isang huwes ng Pasay City Regional Trial Court si Vice-Mayor Antonino Calixto at pito pang kon­sehal dahil sa kasong contempt na nag-ugat sa hindi pagsunod sa ka­utusan ng hukuman.

Bukod dito, pinagmu­multa rin ng tig-P20,000 ni RTC Branch 117 Judge Eugenio Dela Cruz sina Calixto, Councilors Ri­chard Advincula, Maria Luisa Petalio, Rey­naldo Padua, Ian Ven­divel, Imelda-Calixto-Rubiano, Arnel Arceo at Antonia Cuneta.

Binigyan naman ng 10-araw na palugit ni Dela Cruz ang walo na magsu­mite ng kanilang tugon sa kautusan bago ito ipatupad.

Sa rekord ng korte, nag-ugat ang contempt kina Calixto nang mag­sampa ng kaso ang Young Builders Corp. laban sa lahat ng lokal na opisyales ng pamaha­laang panlun­sod ng Pasay kabilang na si Mayor Wenceslao Trini­dad ukol sa nahintong kontrata sa pagtatayo ng bagong gusali ng City Hall.

Pumabor naman si Dela Cruz sa YBC mata­pos na magpalabas ng Temporary Restraining Order na pumipigil sa al­kalde, bise alkalde at mga konsehal na kanse­lahin ang multi-milyong kontrata sa pagtatayo ng bagong gusali pati na ang paglala­bas ng committee report.

Sa halip namang tu­mugon sa utos ng korte, naghain pa ng petisyon sina Calixto na humihiling na bitawan na o mag-inhibit sa kaso si Judge Dela Cruz na tinanggihan naman ng hukom noong Disyembre 14, 2009 dahil sa kawalan ng merito.

Nakasaad pa sa da­lawang pahinang kautu­san ng korte na ang hindi pagsipot ng bise alkalde at mga kaalyadong kon­se­hal sa mga itinakdang pagdinig ay malinaw na wala na silang hangaring tumugon sa kautusan na malinaw na pagbalewala o indirect contempt. (Danilo Garcia)